Galicia Ártabra Digital Noticias de Ferrol y la comarca de Ferrolterra.
A Biblioteca municipal de Narón e a Axencia de Lectura da Gándara acollen esta semana proposta “Namórate dun libro en San Valentín”, dirixida a persoas a partir de 16 anos. Unha iniciativa, tal e como indicou a edil responsable da área, Olga Ameneiro, a través da que se pretende axudar ás persoas interesadas a atopar o seu próximo frechazo literario cunha cita a cegas coa lectura.
Ata o vindeiro sábado día 15 (ou ata esgotar existencias) haberá na Biblioteca unha selección de libros envoltos, de diversa temática e nas diferentes seccións, elixidos dende o centro. As persoas que o desexen poderán levar un deles para a casa, sen ver o título nin a portada da publicación, só unhas pequenas pistas para axudarlles a elixir. A mesma proposta lévase a cabo tamén ata o venres 14 na Axencia de lectura da Gándara.
Esta iniciativa ten entre os seus obxectivos animar á cidadanía a explorar lecturas fóra da súa zona de confort e dar visibilidade a determinados libros que en ocasións pasan desapercibidos entre as novidades. Así mesmo, tamén se ofrece a posibilidade de coñecer a novos autores e autoras e descubrir novos estilos e xéneros literarios
