Galicia Ártabra Digital Noticias de Ferrol y la comarca de Ferrolterra.
O BNG de Ferrol vén de presentar unha moción para o seu debate no pleno de xaneiro, que se celebra o xoves 30, para que o Concello de Ferrol promocione a figura de Castelao. Deste xeito, «preténdese que a Xunta de Galicia recoñeza a Castelao como primeiro presidente de Galicia, e ao Consello de Galicia como o primeiro goberno galego da etapa contemporánea».
Iván Rivas, portavoz nacionalista, pon a atención sobre «a necesidade de que a figura de Castelao sexa debidamente coñecida e valorada polo pobo ao que dedicou os seus esforzos. Lembra que toda a súa vida e a súa obra constitúen un inmenso legado político e cultural que é preciso administrar e divulgar, facendo que os seus ideais se fagan realidade na Galicia de hoxe».
O BNG considera que «temos a obriga de honrar e celebrar a unha das persoas máis senlleiras da historia de Galicia. Ademais debemos de facelo sendo fieis ao seu pensamento, á súa obra e ao seu compromiso político, que constitúen unha unidade indisolúbel».
«Tal e como recolle o texto da moción, as nacionalistas piden que desde o concello de Ferrol se apoie a declaración do 2025 como Ano Castelao e instan ao goberno municipal a impulsar unha programación municipal propia que poña de relevo a dimensión política de Castelao, o seu compromiso con Galicia, a súa obra artística e literaria, e o seu humanismo e internacionalismo solidario».
O BNG afirma, no texto da súa iniciativa que «Alfonso Daniel Rodríguez Castelao (Rianxo, 30 de xaneiro de 1886 – Bos Aires, 7 de xaneiro de 1950) é a principal figura política e cultural da historia contemporánea de Galicia, unha condición que deriva dunha traxectoria vital guiada pola integridade ética, a loita contra todo tipo de discriminacións e desigualdades, a defensa dos dereitos nacionais de Galiza e a militancia no internacionalismo solidario».
