Asociacion Galega de Escritores e Escritoras (AGER) renova a súa xunta directiva

A nova directiva conta con dez membros, repartidos entre as catro provincias galegas, con forte presenza de autores e autoras da comarca de Ferrolterra. 

A Asociación Galega de Escritores, que aglutina a máis dun centenar de escritores e escritoras de toda Galicia, vén de renovar a súa Xunta Directiva tras dous anos de andadura nos que o colectivo desenvolveu preto de cincuenta actividades diferentes destinadas a profesionalizar e mellorar o sector literario, en concreto, a situación dos escritores e escritoras.

A nova Xunta Directiva, que foi aprobada este xoves pasado sen votos en contra, está conformada por dez escritores e escritoras galegos repartidos entre as catro provincias.

Así, a nova presidencia recae na escritora María Nieto (A Coruña). A vicepresidencia estará en mans do escritor Rubén Pedreira (A Coruña), mentres que a secretaría estará ocupada pola escritora Eva Luna (As Pontes) e a tesourería, pola escritora Teresa Cameselle (Ferrol). Roberto Cagiao (Miño), anterior presidente, pasará a ocupar unha vogalía, na que estará acompañado de Pablo J. Rañales (Ares), Miguel Gacio (Ferrol), Almudena Santamaría (Vigo), Nuria Fernández (Vigo) e Andrea Micc (Monforte).

Un proxecto centrado na profesionalización
No seu proxecto directivo, a nova equipa traballa xa nas liñas maestras para os vindeiros dous anos, centradas en profesionalizar a xestión da asociación, axudar á formación e profesionalización dos asociados/as/es, posicionar o colectivo como voz autorizada e representativa dentro do ecosistema literario en Galicia, traballar para aumentar a visibilidade tanto da asociación como dos seus asociados/as/es, e organizar e participar en eventos e proxectos de interese para os asociados e para o colectivo xeral de escritores e escritoras de Galicia.