Galicia Ártabra Digital Noticias de Ferrol y la comarca de Ferrolterra.
O certame, no que tamén foron premiados O Mesón e O Amanexo, levou numeroso público aos establecementos participantes na pasada fin de semana.
A Taberna Bon Pé resultou este ano a gañadora do certame “Tapas de Outono” que organizou o Concello de Cedeira para darlle pulo á hostalería e a gastronomía local. O Mesón acadou o segundo premio e Gastrobar O Amanexo recolleu o terceiro, nunha edición do concurso que espertou grande interese.
Segundo confirmou a concelleira de Emprego e Promoción Económica, Manuela López, houbo moita xente visitando e degustando os petiscos dos dez locales participantes entre o venres e o domingo pasado, cando se desenvolveu a iniciativa, e algún dos establecementos chegou a vender preto de mil unidades.
A Taberna Bon Pé participaba por primeira vez no certame, despois da súa apertura o verán pasado. É un establecemento rexentado por Yolanda Cuesta e Diego Iglesias, que tamén está ao frente dunha comercializadora de marisco. Gañou o concurso co petisco “Mar e montaña de porco celta, centolla e boletus”. O Mesón quedou en segundo lugar coa tapa “Albóndiga en salsa de carrileira, crema de piquillo e bola á sartén” e O Amanexo foi terceiro coa “Carrilleira de frisona style”.
Como sucedeu en anteriores edicións, o “Tapas de Outono” tivo tamén premio para o público. Así, entre as persoas que votaron -emitíronse un total de 360 papeletas- sorteouse unha cea para dúas persoas no local gañador.
