“Campaña de Nadal do comercio de Narón”

O Concello de Narón organiza un ano máis unha campaña promocional do comercio de Narón que se desenvolverá do 2 ao 29 de decembro. Así o indicou a edil de Promoción Económica, Olga Ameneiro, anunciando que os responsables de pequenos comercios e locais de hostalería interesados en participar poden anotarse nas diferentes propostas, unha enfocada aos comercios, outra de decoración exterior dos establecementos comerciais e hostaleiros e outro exclusivo para este último sector.

A campaña de promoción do comercio repartirá papeletas á clientela polas compras realizadas para poder participar no sorteo de catro cestas de Nadal con produtos de proximidade, e tres vales de compra, por importe de 1.000, 600 e 400 euros (para trocar en todos os casos en tres ou máis establecementos dos participantes).

Os participantes poderán anotarse ao longo de toda a campaña, e unha vez inscritos entregaráselles unha urna na que terán que ir depositando as papeletas do sorteo. Para anotarse hai que escribir un correo electrónico á dirección nadalnaron2024@gmail.com indicando no asunto “Campaña de promoción do comercio” e facilitando o nome e apelidos da persoa responsable, o do comercio e un teléfono de contacto.

Outra das propostas, o certame de decoración exterior dirixido ao comercio e á hostalería, para o que hai que anotarse no mail: nadalnaron2024@gmail.com ou a través do número de Whatshapp 672 591 409 e terán que enviar a esa dirección, ademáis dos seus datos e un teléfono de contacto, unha ou máis fotografías da súa decoración de Nadal.

Tres persoas pertencentes a entidades representativas dos ámbitos do comercio, a hostalería e a decoración elixirán ao establecemento gañador, que recibirá como agasallo unha decoración exterior para o local realizada por un profesional do sector.

Neste caso o prazo de inscrición rematará o 10 de decembro. “A nosa intención é encher as rúas de espírito navideño, ambientalas e levar esa decoración do Nadal fóra dos establecementos para compartila cos veciños e tamén coa clientela”, explicou a concelleira.

Por último, está a iniciativa “Datas saborosas”, unha novidosa proposta dirixida a establecementos da cidade que ofrezan ceas, menús especiais ou comida para levar durante as datas festivas do Nadal. A través desta iniciativa terán a oportunidade de comunícalo para aproveitar a difusión que se realizará desta campaña. Os interesados en participar teñen que enviar un mail cos seus datos a nadalnaron2024@gmail.com antes do 29 deste mes de novembro.

A concelleira de Promoción Económica animou aos representantes do sector na cidade a sumarse a estas iniciativas e tamén á veciñanza de Narón e doutros concellos a participar activamente nesta campaña para poder obter algúns dos agasallos que se sortearán nestas datas.

“Queremos promocionar o comercio e a hostalería locais, que ofrecen unha gran variedade de produtos á cidadanía, reforzando o comercio de proximidade e a calidade dos produtos que se ofrecen á clientela”, recalcou Ameneiro.