Cerdido destina 65.000€ do POS+´24 á dotación de abastecementos e mellora de camiños

O Concello de Cerdido destinará unha partida de 65.301 euros, procedentes do POS+2024, en distintas actuacións dirixidas á mellora de servizos e infraestruturas ao longo do seu termo municipal.

Deste xeito, o executivo levará a cabo o proxecto de dotación de abastecemento en Abelleira – Campo Hospital, unha actuación que conta cun importe de 38.901 euros e que estará financiado con cargo aos fondos do POS+2024 da Deputación da Coruña.

A intervención suporá a instalación de 1005 metros de tubaxe de polietileno con 16 arquetas para darlle continuidade á rede actual, así como na reposición do firme afectado polas obras.

Tamén se fará emprego de fondos provinciais para a execución do proxecto de mellora dos camiños de acceso a Cuqueira e a Rañoa. Dita actuación estará dotada dun orzamento que ascende a 26.400 euros e que suporá no primeiro vieiro a mellora da capa de rodaxe con aglomerado en quente, ademais dun treito de 65 metros que será pavimentado con formigón.

No segundo camiño mellorarase a capa de rodaxe con saburra, previo bacheo con pedraplén. En ambas intervencións realizarase a apertura de gabias e a limpeza de salvagabias para o correcto drenaxe lonxitudinal e transversal.