Galicia Ártabra Digital Noticias de Ferrol y la comarca de Ferrolterra.
O Concello de Cedeira adxudicou por 76.621,64€ (IVE incluído), á mellor das tres ofertas que se presentaron ao proceso, as obras de mellora da capa de rodadura de dous camiños de titularidade municipal: o que vai de Meizoso a Biduido e o ramal que conecta Meizoso coa DP2205, na parroquia de Régoa.
A actuación contará principalmente con financiación do programa da Agader (64.170,72€), que se completará con recursos municipais.
O camiño de Meizoso a Biduido percorre 2,9 quilómetros e o seu ancho vai dos 3 aos 3,5 metros, mentres que o ramal de Meizoso ata a estrada provincial ten 700 metros de lonxitude e un ancho de tres metros. Ambos os dous presentan un importante grao de deterioración e cómpre abordar a súa mellora.
A actuación vai consistir na limpeza e perfilado dos foxos, así como nunha escavación na zona de mordentes á saída de Meizoso en dirección a Biduido, na marxe dereita, para corrixilos, e tamén na construción dunha gabia de formigón nunha zona da Condocia para canalizar un efluente que corre ao lado do camiño.
Despois farase o recheo de fochancas e finalmente un doble tratamento superficial para darlles aos camiños unhas condicións máis acordes ao tráfico que soportan.
O prazo de execución será dun mes.
