A tradicional Travesía a Nado Ría de Ares celebra a súa XXVII Edición

Alma Barrón, concelleira de Deportes, Victoria Jiménez, presidenta do Club Natación de Ferrol, e Javier Sánchez, técnico deportivo municipal, presentaron este martes 9 na casa consistorial de Ares a nova edición da Travesía a Nado Ría de Ares, unha proba que xa vai polo seu vixésimo sétimo ano e que se atopa entre os principais eventos deportivos do verán na localidade xunto coa clásica Milla Urbana.

Os representantes das entidades involucradas detallaron o funcionamento desta Travesía que se organizará a partir das 17:30 horas do sábado 20 de xullo, na Rampla Grande de Ares, enchendo así a contorna de nadadores e visitantes.

A proba contará un ano máis cunha ampla mostra de categorías, dende crianzas a máis maiores, e tamén variabilidade nas distancias: dos 100 metros da categoría popular aos 1.000 metros da distancia máis longa.

Como en anteriores edicións, entregaranse trofeos aos gañadores absolutos tanto en categoría masculina e feminina, así como ao nadador máis mozo e o máis veterano. E na categoría popular, habilitada para todas as idades, haberá medallas para todos os participantes.

Deste xeito, habilitáronse 150 prazas a cubrir de xeito telemático a través da web municipal www.concellodeares.gal, enchendo o formulario que se atopará dispoñible no apartado correspondente. O proceso de inscrición estará aberto ata o xoves 18 de xullo, ás 9:00 horas.

No caso de non esgotar todas as prazas consignadas, o mesmo día da proba, de 16:00 a 17:00 horas na Rampla Grande de Ares, as persoas interesadas poderán reservar as sobrantes por orde de chegada á mesa de dorsais. O prezo establecido é de 3 euros para todas as categorías agás a popular, con participación de balde.

Como informan dende a organización, establecerase unha zona de avituallamento frío e quente con froitas, barritas enerxéticas e bebidas isotónicas.

Aproveitando a presentación no consistorio de Ares, o Concello traslada o seu agradecemento a todas as entidades que colaboran para facer posible a proba deportiva: dende Serviocio BeOne ao Club Natación Ferrol, Supermercados Froiz, Protección Civil de Ares, o Club Marítimo de Redes e o Club Náutico de Ares.

Lea también

Concurso de Saltos Nacional*** Cidade de Ferrol e competicións hípicas Equiocio Ferrol

Equiocio Ferrol activa as inscricións para a totalidade das competicións hípicas da súa próxima edición, …

Deja una respuesta

Tu dirección de correo electrónico no será publicada. Los campos obligatorios están marcados con *