Galicia Ártabra Digital Noticias de Ferrol y la comarca de Ferrolterra.
O Concello de Fene iniciou as obras de mellora de varios viais municipais, co obxectivo de mellorar a seguridade e accesibilidade na contorna do campo de fútbol de Perlío, cun investimento de máis de 305.000 €. Conflúen na zona no tempo dúas actuacións complementarias previstas pola área de obras, unha e de mellora do campo de fútbol de Perlío e camiños de Loira e Carballás, e outra de mellora dos camiños Castro e Beiramar.
O concelleiro de Obras, Manuel Polo, realizou unha visita á zona para supervisar o desenvolvemento dos primeiros traballos e avaliar a súa importancia para a veciñanza do lugar.
Nos camiños de Loira e Carballás, así como no entorno do campo de fútbol de Perlío, levaranse a cabo traballos de perfilado e refinado dos bordes exteriores, cunetas e pasos salvacunetas, para aplicar posteriormente unha capa de rodaxe en boa parte do trazado, no que o paso do tempo provocou a erosión co consecuente mal estado actual do firme.
Nos camiños Castro e Beiramar procedeuse á substitución das redes de saneamento e abastecemento, para posteriormente realizar unha pavimentación en formigón para uso peonil, que se completará co asfaltado e posterior pintado das marcas de sinalización viaria correspondentes.
Para Polo, estas actuacións “son esenciais para garantir a seguridade e comodidade da veciñanza destes camiños”, e asegurou que “a mellora do pavimento e a renovación dos sistemas de saneamento contribuirán a facilitar o tránsito de persoas e vehículos ao tempo que eliminarán as deficiencias que viñan provocando roturas constantes nas redes municipais”.
O concelleiro de obras, subliñou tamén “o compromiso do Concello para continuar traballando en proxectos que melloren a calidade de vida da veciñanza fenesa” e adiantou que nos próximos días comezarán “outras obras relevantes para o día a día que xa foron licitadas”.
Investimentos con cargo ao POS+
Boa parte dos investimentos proxectados polo Concello de Fene fináncianse con cargo ao Plan Único da Deputación da Coruña. Así, o proxecto de mellora do entorno do campo de fútbol de Perlío e Camiño de Loira vai con cargo ao POS+2022, e o de mellora dos camiños Castro e Beiramar ao POS+2023 Complementario.
Ademais, o Concello de Fene tamén levou a cabo investimentos con fondos propios na zona para substituír as canalizacións de saneamento e abastecemento, debido ao mal estado no que se atoparon no momento de proxectar as obras.
