Amalia Díaz, protagonista en Cerdido da mostra ‘Unha obra, unha mirada”

A concelleira de cultura de Cerdido, Amalia Díaz é a protagonista da A mostra, «Unha obra, unha mirada» que se poderá ver na Casa do Concello ata que remate o mes, en horario de 8 a 14:30 horas, son cadros realizados en óleo, acrílico e lenzo.

Amalia é unha artista multidisciplinar, pois realiza pintura e poesía, comezou a ter afección pola arte cando de pequena facía tarxetas de nadal con lápices de cores e acuarelas, acompañadas de poemas. Co paso do tempo o seu interese derivou en experimentar con outras técnicas.

Díaz comezou a publicar nas súas redes sociais as distintas creatividades e a partir de aí pasou a presentar os seus cadros e poemas a diferentes concursos e revistas de poesía, participou en exposicións individuais e colectivas, ademais de formar parte de festivais poéticos.

A artista e concelleira achega, deste xeito, o seu grao de area á dinamización cultural no municipio, expoñendo as súas obras para que tanto a veciñanza como os visitantes poidan ver as pezas que forman parte da súa colección.

Hai que lembrar que con este ciclo de exposicións, o Concello o que pretende é poñer en valor a arte local, á vez que dinamiza o ámbito cultural no municipio ao longo de todo o ano.

Segundo indica a concelleira de Cultura, Amalia Rodríguez, “é un auténtico pracer facer a miña pequena aportación á programación cultural do noso municipio, a través da participación nas exposicións de carácter mensual de ‘Unha obra unha mirada’.

A concelleira quixo darlle as grazas “a todos e cada un dos artistas que pasaron durante estes meses por este programa, que enriquecen a dinamización cultural do noso municipio e achegan a unha vila rural como a nosa a arte, sen ter a necesidade de ir ás cidades para poder ter este tipo de actividades”.