O Festival Atlántica despídese esta fin de semana cun maratón de contos nunha ducia de sedes

A duodécima edición do Festival Atlántica clausúrase esta fin de semana cunha intensa programación que espallará a arte da narración oral por unha ducia de puntos de Galicia e Portugal. Un total de vinte actividades desenvolveranse nos concellos de Santiago de Compostela, Teo, Ferrol, Palas de Rei, Outes, Alfoz, Dodro, A Pobra do Caramiñal, Ribeira, Vilalba, Chantada e A Estrada e mais en Pitões das Júnias e Meaus, en Portugal. Contos, música, un roteiro en bicicleta, unha visita guiada ou contos nos árbores son algunhas das actividades que figuran no programa.

Pola súa banda, Ferrol pecha a celebración dos seus dez anos como sede Atlántica con dúas propostas este sábado 6. A primeira será ás 12 horas no Parque Raíña Sofía onde Raquel Queizás engaiolará aos máis pequenos con Mares de contos. No mesmo lugar, pero ás 21 horas, será a quenda dos adultos con Unha chea de contos de Avelino González.

Vermú de contos

A clausura festiva deste XII Festival Atlántica será o domingo, 7 de xullo, co tradicional Vermú de contos que xunta aos artistas e o público a redor dun xantar colectivo onde uns e outros están convidados a compartir historias (A Estrada, lugar de Riobó, a partir das 13 horas).

O XII Festival Atlántica é posible grazas ao patrocinio da Xunta de Galicia e da Deputación da Coruña e ao apoio dos concellos de Santiago de Compostela, Ferrol, Teo, Alfoz, Caldas de Reis, Dodro, Mugardos, Outes, A Pobra do Caramiñal, Ribeira, Sanxenxo e Vilalba.

A programación actualizada pódese consultar na web festivalatlantica.gal.