Galicia Ártabra Noticias de Ferrol y la comarca de Ferrolterra.
A deputada de Industria e Empresa destacou os 112 millóns de euros que a Administración provincial investiu en apoiar a pemes e autónomos. Recordou que grazas ás subvencións concedidas nos últimos sete anos se contratou a unhas 7.200 persoas desempregadas.
A deputada provincial de Industria, Empresa, Medio Ambiente, Emprego e Política Demográfica, Rosa Ana García, destacou en Santiago o compromiso da Deputación da Coruña coas pequenas empresas.
Durante a entrega do Premio Peme do Ano, que concede a Cámara de Comercio compostelá, sinalou ás pequenas e medianas compañías como “o motor económico da nosa provincia”, ademais de constituír “o corazón das nosas comunidades”.
García repasou na súa intervención algunhas das iniciativas coas que a Administración provincial apoia ao tecido produtivo. “Estamos plenamente comprometidos co apoio ás pemes, insistiu, e sabemos que para que poidan seguir crecendo e xerando riqueza é fundamental ofrecer recursos e formación e crear unha contorna favorable”. Os 112 millóns de euros que a Deputación leva investidos con ese obxectivo son, dixo, “unha proba diso”.
A deputada lembrou que existen varias liñas de axuda provinciais de carácter anual que chegan tamén aos autónomos. Grazas a elas, por exemplo, poden sufragar parte das súas cotas sociais, modernizar os seus negocios a través de investimentos ou avanzar na dixitalización, pero tamén poden aproveitar a rede de espazos da Deputación para dispoñer dun lugar de traballo.
Entre algúns dos beneficios destes programas, citou a posibilidade de abrir as portas de mercados máis amplos e contratar persoal. De feito, unhas 7.200 persoas desempregadas accederon a un posto de traballo durante os últimos sete anos grazas ás liñas de axudas a empresas que ofrece a Deputación.
“Hoxe celebramos a excelencia, a sustentabilidade, a internacionalización, a dixitalización, a innovación e, sobre todo, o esforzo das nosas pequenas e medianas empresas”, apuntou Rosa Ana García, que asegurou que na provincia coruñesa “respírase talento, creatividade e un espírito emprendedor inquebrantable”.
Tamén fixo unha mención especial á sustentabilidade e ao “papel crucial” das pemes “na transición cara a unha economía verde e circular”. Por ese motivo, subliñou, a Deputación seguiralles dando soporte aos proxectos que promovan a eficiencia enerxética, o uso de enerxías renovables e a xestión responsable dos recursos. “Queremos que A Coruña sexa un referente en sustentabilidade e responsabilidade social empresarial”, remarcou.
“O noso esforzo e compromiso está dirixido a seguir a carón de vós, traballando para brindar todo o respaldo necesario, promovendo políticas e programas que impulsen o desenvolvemento e a competitividade”, reiterou a deputada.
