A CIG reclama a readmisión dunha delegada do SAF de Narón

Eulen alega por su parte que non é apta por cuestións médicas, pero a CIG entende que o motivo real da decisión é súa actividade sindical. O Goberno municipal convocou outra reunión para este xoves día 13, na que estarán todos os partidos políticos da corporación, o comité de empresa e a propia concesionaria.

A CIG-Servizos concentrouse este martes diante das oficinas da empresa Eulen en Narón para reclamar a readmisión dunha traballadora e delegada do comité do SAF á quen a empresa despediu alegando que non é apta para desenvolver o seu traballo por cuestións médicas. Durante a protesta tamén se demandou a intervención do Concello de Narón, como titular do servizo.

Cristina Martínez Padín, da CIG-Servizos de Ferrol, explica que «aínda que a traballadora foi considerada nun primeiro momento apta con limitacións e que a empresa mesmo lle adaptou o posto, transcorrido un tempo mandouna a outro procedemento de revisión e a mutua entón cualificouna como non apta», situación que aproveitou Eulen para despedila de inmediato».

Según explica a CIG resulta chamativo «que a empresa tomara esta decisión co proceso de eleccións sindicais en marcha e cando se sabía que a traballadora afectada formaría parte da candidatura da CIG», e no que a traballadora resultou elixida delegada de persoal no comité do SAF.

Neste contexto, e ante a negativa de Eulen a readmitila, o despedimento foi recorrido en vía xudicial; «A sentenza do Social determina que a compañeira pode traballar e que o despedimento é improcedente, pero deixa a criterio da empresa a decisión de reincorporala ou indemnizala. Por suposto, Eulen optou pola indemnización, condenando a traballadora ao desemprego», denuncia Martínez Padín, quen xa avanzou que a resolución está recorrida ao entender que esta decisión debe recaer na propia traballadora.

A representante da CIG subliña que «a verdadeira razón pola que Eulen despediu a esta compañeira non ten relación coa súa condición médica (pois a outras compañeiras coas mesmas limitacións si que lle adaptou o posto), senón coa actividade sindical que desenvolve«. «A empresa aproveitou esta oportunidade para desfacerse dunha traballadora que lle resultaba molesta polo súa acción sindical e facelo ademais de maneira barata», critica.

A este respecto, indica que até as pasadas eleccións a CIG non tiña representación no SAF de Narón e agora «somos o sindicato maioritario con 5 delegadas das 9 que integran o comité». Este resultado evidencia «as ganas que tiña o persoal do servizo de mudar a súa representación sindical«.

Co obxectivo de resolver a situación, a CIG reuniuse co Concello de Narón e denunciou a actitude da empresa no pleno municipal, mais según denuncia o sindicato «o Goberno eludiu as súas responsabilidades escusándose en que trata dun problema entre unha empresa privada e a traballadora. Pero este atropelo non pasaría se o servizo de axuda no fogar estivera xestionado directamente polo Concello«, asevera Padín.

Reunión o próximo xoves
Coa concentración xa anunciada, o Goberno municipal convocou outra reunión para este xoves día 13, ás 17 horas, na que, segundo comentou, estarán todos os partidos políticos da corporación, o comité de empresa e a propia concesionaria.

Á espera do que poida saír dese encontro, a CIG avanza que levará adiante todas as accións sindicais, xudiciais e institucionais que sexa necesarias para defender os dereitos da traballadora e que sexa reincorporada no seu emprego.