Galicia Ártabra Digital Noticias de Ferrol y la comarca de Ferrolterra.
A Biblioteca Municipal de Valdoviño quedouse pequena o pasado venres na presentación de “A noite das cebolas”, a última novela da escritora local Rosa Aneiros.
Preto dun centenar de persoas acudiron ao encontro coa autora, que participaba previamente no Foro Galego Literario conducido polo investigador e escritor Antón Cortizas. A acollida emocionaba a Rosa Aneiros, que xogaba na casa, neste caso a favor, desmontando o mito de que ninguén é profeta na súa terra.
Tras a benvida da concelleira de Cultura, Rosana García, e da presentación de Cortizas, o cantautor Óscar Fojo inauguraba o acto cunha fermosa canción de berce con letra do autor e impulsor do foro. Outra compañeira das letras, a poeta Ana Varela, iniciaba entón unha conversa pausada con Rosa Aneiros, fórmula elixida para presentar a súa obra.
Unha novela, por riba de todo, honesta, tal e como a definía a súa autora que, sen querer dar demasiados detalles ao lector, si avanzaba o seu punto de partida, o inicio dunha viaxe por parte da súa protagonista, enferma dun cancro terminal. E aínda así, unha novela optimista e positiva.
O universo Rosa Aneiros continúa deste xeito estendéndose con “A noite das cebolas”, e a súa terra volve facerse presente nas súas páxinas, tal e como subliñaba o venres, ante a súa xente, a de Valdoviño, a da casa.
