Preto de 200 xinetes e amazonas confirmaron a súa participación na segunda edición de “As Pontes Ecuestre”. A cita reunirá este domingo 9 na contorna do lago a un total de 210 cabalos pertencentes a clubs de toda a xeografía galega, e cunha forte presenza das provincias da Coruña e Lugo.
O Club Hípico Prado Ventura, promotor do evento co apoio do Concello de As Pontes e da Federación Hípica Galega, valorou moi positivamente os rexistros de participación, alentados polo salto de categoría da competición, que nesta segunda edición acollerá probas de carácter autonómico.
A uns días de que se celebre o certame, o director deportivo, Federico Pérez Lago, avanzaba que a organización traballa xa a pé de terreo, habilitando a pista de competición, de 200 m de lonxitude e 35 m de ancho.
A primeira proba do calendario será a do Campionato Galego de Andadura, que arrincará ás 11:00 h, coa participación de 120 cabalos. Unha hora despois prevese o inicio do Concurso de Saltos Territorial, con 60 saídas a pista.
Xa pola tarde, ás 17:00 h, arrincará a proba do Campionato Galego de Enganche, con 12 participantes, así como o torneo triangular de horseball -baloncesto a cabalo-, con partidos de 30 minutos entre equipos de Redondela e Pontevedra.
Ademais, a técnica hípica de Prado Ventura, Noa García, lembra que á tarde o certame convidará a nenos, mozos e persoas adultas a participar nos bautismos hípicos, unha boa forma de achegarse a esta práctica deportiva. Será de 17:00 a 19:00 horas.
O salto de categoría das diferentes probas tamén trae consigo a dotación económica dos trofeos, e repartiranse preto de 3.000 euros na competición. Premios que se entregarán sobre as 19:00 h, pechando o certame.
Por último, tanto dende o Club Hípico Prado Ventura como dende o Concello das Pontes anímase á cidadanía a secundar a cita, e desfrutar do espectáculo que, de seguro, darán xinetes e amazonas.
Horarios estimados de As Pontes Ecuestre:
09:00 horas: Recepción de participantes
11:00-14:30 e de 15:30 a 19:00 horas: Campionato Galego de Andadura
12:00-14:30 e de 15:30 a 17:00 horas: Concurso de Saltos Territorial
17:00-19:00 horas: Campionato Galego de Enganche
17:00-19:00 horas: Torneo triangular Horseball
19:00 horas: Entrega de premios e clausura