Galicia Ártabra Digital Noticias de Ferrol y la comarca de Ferrolterra.
O Grupo Municipal Socialista denuncia o teatro do novo protocolo que reproduce o convenio asinado en 2020. Psoe Ferrol desexa expresar a súa enérxica crítica ante o anuncio do novo protocolo entre o Concello de Ferrol e a Autoridade Portuaria de Ferrol-San Cibrao (APFSC), presentado por parte do goberno municipal do Partido Popular.
«Este novo protocolo, anunciado polo alcalde José Manuel Rey Varela, é simplemente un intento descarado de maquillar a parálise política que caracterizou a xestión da relación entre o Concello e a Autoridade Portuaria. Na realidade, o que se presenta como un avance histórico non é máis que unha repetición do convenio asinado en 2020, que foi bloqueado por intereses partidistas e nunca chegou a implementarse».
«O Partido Popular pretende presentar este protocolo como un logro propio, ocultando o feito de que o convenio orixinal, aprobado en pleno co voto favorable do Partido Popular en 2020, xa marcaba as pautas para establecer os termos e condicións para a compensación de débedas e a cesión de espazos públicos estratéxicos para Ferrol. Sen embargo, a chegada do novo presidente da Autoridade Portuaria, alineado co Partido Popular, bloqueou a firma e execución deste convenio por motivos exclusivamente políticos».
O Grupo Municipal Socialista denuncia «esta estratexia manipuladora e esixe transparencia e honestidade por parte do goberno municipal. Non permitiremos que se utilice a boa vontade e o traballo previo da administración anterior como un mero instrumento político para obter réditos propios. Os cidadáns de Ferrol merecen un goberno que non actúa no interese do PP e non manipule a realidade para beneficio partidista».
«Instamos ao goberno municipal a deixar de lado o teatro político e a asumir a responsabilidade das súas accións. É hora de traballar de maneira construtiva e colaborativa para o beneficio real de Ferrol e os seus cidadáns, en lugar de buscar réditos políticos á costa do progreso da nosa cidade».
