Aberta en Narón a inscrición para asistir ao espectáculo “A maxia de Europa”, con Pedro Bugarín

A Biblioteca municipal acollerá o vindeiro 15 de maio, ás 18:00 horas, o espectáculo “A maxia de Europa”, unha iniciativa promovida por Europe Direct en colaboración co Concello de Narón. A edil de Bibliotecas, Olga Ameneiro, explicou que se trata dunha proposta dirixida a poboación moza e público en xeral e que para poder asistir é preciso reservar praza previamente na Biblioteca de xeito presencial ou chamando ao número de teléfono: 981 382 173.

O obxectivo da actividade, programada con motivo do Día de Europa, que se conmemorou onte, é compartir os valores que representa a Unión Europea e dar a coñecer os seus símbolos máis representativos, así como as oportunidades que representa a cidadanía europea.

O espectáculo terá unha duración de case unha hora, un tempo no que se ofrecerá de xeito máxico, sinxelo e visual coñecer os símbolos e valores europeos a través dun espectáculo de maxia a cargo do mago Pedro Bugarín.