As Pontes invirte preto de 110.000€ na mellora da rúa da Balsa

O Concello de As Pontes investirá 109.053 euros, procedentes da Deputación da Coruña, no proxecto básico e execución das obras de mellora de servizos e pavimentos na rúa da Balsa.

Esta actuación ten como obxectivo mellorar a accesibilidade así como os servizos públicos de alumeado e saneamento no viario, no tramo comprendido entre a a Rúa Tras da Ponte e a Rúa Eume.

Así executarase unha nova pavimentación mediante formigón armado impreso e coloreado, resolvéndose o encontro coa calzada mediante a colocación de bordo de formigón.

Instalaranse novas canalizacións, tanto para o alumeado como para os servizos de telecomunicacións e novos novos báculos e luminarias en todo o percorrido da zona de actuación.

Por outra banda, executaranse as instalacións de saneamento mediante redes separativas e as acometidas necesarias. Os traballos rematarán coa instalación de mobiliario urbano e a execución e reposición da sinalización horizontal e vertical pertinente.