Valdoviño incorpora tres novos camións á frota de vehículos do servizo de recollida do lixo

Trátase dun recolector compactador de carga lateral e doutro de carga traseira, e dun auxiliar de caixa basculante, con maior maniobrabilidade en espazos de difícil acceso e elevada carga útil.

O Concello de Valdoviño vén de incorporar 3 novos camións á frota de vehículos destinados ao servizo de recollida de residuos sólidos urbanos.

En concreto, un recolector compactador de carga lateral de 19 m3 e un segundo vehículo de carga traseira, ademais dun vehículo auxiliar de caixa basculante. Súmanse así aos recursos xa existentes: outros 3 recolectores compactadores -2 de carga lateral y 1 de carga traseira-, un auxiliar de caixa aberta e grúa, e 1 hidrolimpadora.

O alcalde, Alberto González, sinalaba esta mañá que comparten como características a súa maniobrabilidade e elevada carga útil, o que lles confire un maior rendemento e polivalencia. Así, estes vehículos facilitan o servizo en rúas con acceso moi difícil ou imposible para vehículos pesados estándar. Ademais, chasis e carrocería foron deseñados co obxectivo de lograr a máxima eficiencia enerxética, aumentado os rendementos de cada un dos seus compoñentes, reducindo o consumo de combustible e, por tanto, as emisións contaminantes e o CO2.

A incorporación destes vehículos constitúe unha das melloras contempladas no novo contrato de recollida de residuos sólidos urbanos, adxudicado a FCC Medio Ambiente S.A.U. Un contrato no que o Concello de Valdoviño investirá preto de 4,5 millóns na próxima década -444.067,26 euros ao ano-.