O Campus Industrial de Ferrol acolle o coloquio “Palestina, presente e futuro”

A Aula Magna da Facultade de Humanidades e Documentación do Campus Industrial de Ferrol acolle este martes 5 de marzo, ás 17:00 horas, o coloquio “Palestina, presente e futuro” no que participa o embaixador xefe da misión diplomática de Palestina en España, Husni Abdel Wahed, como entrevistado, e o profesor de Historia Antiga da Universidade da Coruña, Juan Luis Montero Fenollós, como entrevistador

O reitor da Universidade da Coruña, Ricardo Cao, abrirá e pechará o acto de presentación do coloquio no que participará tamén a decana da Facultade de Humanidades e Documentación, Manuela del Pilar Santos.

Está previsto que asista como público a vicerreitora do Campus de Ferrol e Responsabilidade Social, Ana Ares.

O Campus Industrial da Universidade da Coruña promove, en colaboración coa Facultade de Humanidades e Documentación, un coloquio dirixido ao alumnado do grao en Relacións Internacionais e aberto a toda a comunidade universitaria así como ao público xeral interesado. A entrada é libre e gratuíta ata completar o aforo.