Pontedeume conta cun novo camión de recollida de lixo

O Concello de Pontedeume vén de recibir un novo camión para o servizo municipal de recollida de residuos, adquirido co financiamento do Plan Único da Deputación da Coruña.

O alcalde de Pontedeume, Bernardo Fernández, explica que este novo vehículo “substitúe a un dos dous camións anteriores, concretamente ao máis antigo, que xa contaba con máis de 30 anos de servizo”.

Esta nova adquisición é “froito do compromiso deste Goberno, iniciado xa no 2015, de ir renovando o parque móbil”, sinala Fernández Piñeiro.

“Dende que estamos gobernando adquirimos, ademáis deste novo camión do lixo, un vehículo para Urbanismo, outro para a Policía Local, dous camións para Vías e Obras, e un tractor que chegará nuns días”, enumera o rexedor.

O camión “virá mellorar o servizo de recollida de residuos, pois conta con mellores características técnicas, e permitirá un aforro maior de combustible ao ter un menor consumo que o anterior”, conclúe Fernández Piñeiro.