Galicia Ártabra Digital Noticias de Ferrol y la comarca de Ferrolterra.
A alcaldesa da cidade de Narón, Marián Ferreiro, asinou un convenio con Nuria Pérez, presidenta da asociación Cometa, nun acto no que estiveron tamén presentes o edil de Medio Ambiente, Manuel Ramos, e outras representantes da citada entidade.
O acordo ten como obxectivo, tal e como indicou a rexedora local, establecer as bases de colaboración técnica e económica entre o Concello de Narón e a asociación Cometa para executar actuacións, sanear e esterilizar, entre outras, nas colonias felinas da zona urbana, para que estean nas mellores condicións sanitarias e mellorar a salubridade pública da zona na que se localizan.
En virtude ao convenio o Consistorio comprométese a aboar os gastos derivados das esterilizacións, vacinacións e desparasitacións nos termos acordados coa Mancomunidade, formalizando a colaboración entre Cometa e veciños voluntarios para o control ético das colonias felinas.
Deste xeito, tal e como se recolle no documento, dende o Concello autorízase á asociación Cometa a levar a cabo a coordinación da xestión ética das colonias felinas, debendo a entidade identificar ás persoas que baixo a organización da mesma poderán levar a cabo actuacións de alimentación e saneamento, así como captura para a esterilización ou tratamento dos gatos das colonias felinas.
Pola súa banda, a asociación comprométese a elaborar un censo da colonia felina, indicando o número de exemplares que a integran, estado xeral dos animais e indicación dos que están esterilizados. Así mesmo, será responsabilidade dos coidadores o control hixiénico da colonia, sendo estritos nas condicións ambientais e de limpeza dos comedeiros e bebedoiros dos animais.
A alimentación dos felinos só poderá realizarse nas zonas previamente acordadas co Concello e terá que levarse a cabo a diario con penso seco e auga limpa e fresca en igual horario, para minimizar comportamentos molestos e facilitar a observación das colonias.
A alcaldesa destacou e valorou o traballo que realiza o persoal da asociación Cometa e o das voluntarias e voluntarios que levan a cabo os traballos de alimentación dos felinos baixo unhas medidas que garantan a salubridade precisa para este tipo de actuacións.
Así mesmo, Ferreiro recordou que o Concello dispón dunha ordenanza sobre a protección e tenza de animais de compañía e potencialmente perigosos na que se especifican, entre outros, unha serie de medidas específicas para as colonias felinas, incidindo en que o seu control e seguemento “é unha actividade de interese xeral para o conxunto da comunidade que precisa da colaboración das administracións, asociacións protectoras de animais, como neste caso Cometa, e persoal voluntario”.
