O BNG de Ferrol conmemora o Día de Rosalía «ante o esquecemento do goberno local»

O Bloque Nacionalista Galego de Ferrol conmemorará mañá, 23 de febreiro, o Día de Rosalía cun acto na praza de Rosalía, no barrio de San Xoán, ás 12 horas coa que pretende honrar á memoria da poeta e lamenta que, «un ano máis, o goberno local se esqueza de conmemorar esta efeméride.«

María López, concelleira o BNG en Ferrol, sinala que «tristemente o goberno local volve a deixar pasar esta data e sen programar ningunha actividade no propio día de Rosalía. Esquecendo os acordos plenarios aprobados por unanimidade da corporación co obxectivo de resaltar esta data e celebarar actos ao redor da figura de Rosalía de Castro.»

A concelleira considera que «non é de recibo esta forma de proceder do goberno municipal caracterizada pola rutina e por pensar que este día pode conmemorarse só cunha ofrenda floral sen presencia institucional nin de público ao contrario dos actos que sen rubor organiza o alcalde para aquelas cousas que si que lle interesan.»

María López lamenta profundamente que o goberno municipal deixe a Ferrol «á marxe destas actividades tan diversas, onde se implica a cidadanía para dar a coñecer, valorar e fomentar a nosa gran poetisa coa súa obra e o seu pensamento que segue tan vixente nos nosos días.«