Remate da exposición Cantámola, tras o seu paso polo Concello de Cabanas e o CEIP Eladia Mariño

Logo do seu paso polo Concello de Cabanas, onde se celebrou a inauguración o  luns, día 19 de setembro, a exposición “Cantámola” trasladouse entre o mércores 23 e o venres 25 desta semana ás instalacións do CEIP Eladia Mariño, onde o equipo docente organizou visitas e diferentes actividades arredor da exposición e a unidade didáctica que a acompaña.

Nestas actividade traballáronse os aspectos destacados dos diferentes referentes da infancia e da mocidade, e a súa relación cos valores das linguas. Neste contexto, fíxose especial incidencia no fenómeno emerxente de creación musical en lingua galega como impulso do prestixio do galego.

“Hoxe en día o panorama musical galego ofrécenos alternativas para todos os gustos, desde a fusión das Tanxugueiras ó rap de autores como GutiGZ, pasando pola experimentación electrónica, o pop-rock ou a música tradicional”, sinalou a concelleira de normalización lingüística de Cabanas, Paula González, quen tamén destacou o bo momento que está a vivir a música infantil en galego “que destaca pola súa calidade e variedade, con artistas e grupos como María Fumaça, A Gramola Gominola, Paco Nogueira ou Uxía Lambona e a Banda Molona”.

A exposición “Cantámola” está formada por 14 paneis que afondan na creación musical de Galiza e en galego, e o seu percorrido pola nosa comarca está coordinado polo Servizo de Normalización Lingüística que comparten os concellos de Cabanas, Valdoviño, Ares, Mugardos e Neda. Tras visitar Cabanas, a mostra percorrerá os outros catro concellos durante as próximas semanas.

O acto inaugural tivo lugar o pasado luns no Concello de Cabanas e nel participaron representantes dos cinco concellos, ademais da deputada provincial de normalización lingüística, María Muíño, o autor da exposición, Pepe Cunha, e a cantora mugardesa Sofía Espiñeira, quen puxo a nota musical ó evento.

As actividades arredor do Día do Orgullo Neofalante, que se celebra o 1 de outubro, coincidindo coa data de nacemento de Andrés do Barro, continuarán en Cabanas nos próximos días. Entre elas, destaca a celebración dun concerto de MJ o día 3 de outubro, que se celebrará nas instalacións do CEIP Eladia Mariño.