Narón-A alcaldesa e edís da corporación reuníronse no Concello con Diego Taibo, deputado socialista no Congreso

A alcaldesa de Narón, Marián Ferreiro, e o edil de Servizos Ibán Santalla, xunto co portavoz do PSOE de Narón, David Pita e os edís de Sanidade e Medio Ambiente, Santiago Galego, e Benestar Social, Catalina García, reuníronse no Concello co deputado socialista no Congreso Diego Taibo. No transcurso da xuntanza os representantes do goberno local naronés plantexaron a Taibo diversos asuntos de interese para a cidade.

Un dos temas que trataron na reunión foron os problemas que dende hai varios anos se rexistran na cidade e na comarca en xeral co servizo ferroviario de vía estreita. A escasez de frecuencias, a falta de puntualidade nos horarios, as reiteradas avarías na vía estreita e outros aspectos relacionados coas infraestruturas, que se abordaron en varias sesións dos Consellos Territoriais que dende o pasado mes de maio se celebran na zona urbana e rural da cidade, trasladáronse a Taibo. O deputado comprometeuse a establecer contactos con diferentes organismos para trasladar estas deficiencias.

A situación actual da ría e os polígonos industriais de Narón foron outros dos asuntos abordados con Taibo, que se ofreceu para presentar iniciativas no Congreso sobre os temas abordados e tamén sobre outras problemáticas que considere o goberno local.
A alcaldesa e os edís que se reuniron co deputado socialista agradeceron a súa visita ao Concello naronés e tamén a súa boa disposición para trasladar ao Congreso asuntos que afectan á cidade e tamén a outros concellos da comarca.