O BNG acusa de hipocrisía a PP e PSOE polo estado da cidade

O Bloque Nacionalista Galego de Ferrol denuncia a «hipocrisía» do Partido Popular e do Partido Socialista respecto da situación xeral da cidade, tanto «no que non depende directamente do concello como no referido a aquelas decisións que se teñen que tomar noutros ámbitos políticos nomeada e fundamentalmente a administración estatal«.

Para o BNG é unha «hipocrisía evidente os lamentos do señor Rey Varela e do señor Mato sobre a falla de traballo nesta cidade, namentras as dúas organizacións políticas, tanto PP como PSOE, avalan un plan industrial para a empresa Navantia que esta a supoñer un novo proceso de reestruturación fundamentalmente na industria auxiliar pero tamén no plantel principal«.

O PP e PSOE, lamentan a falla de carga de traballo «pero non cuestionan o confinamento de Navantia ao sector militar e esas mesmas organizacións políticas afirman que non teñen competencias para poder tomar decisións nin desde o concello nin desde a Xunta respecto do principal sector produtivo desta cidade pero avalan o actual marco competencial que fai que a dependencia dos estaleiros galegos sexa plena e absoluta da administración estatal en Madrid«.

O BNG considera que o mesmo acontece respecto das políticas a desenvolver desde o ámbito local «nas que supostamente tanto Mato como Rey Varela falaban de 10 puntos sobre os cales tiñan un acordo pleno e que polo tanto se eses acordos non se levan adiante é porque esas duas organizacións políticas non o queren facer. Conservando os privilexios do Estado e das transnacionais da cidade«.

Cuestións como o convenio con Defensa que «segue a permitir que o Ministerio deixe de pagar impostos nesta cidade, a privatización permanente da xestión de recursos básicos coma o auga ou o lixo en función dos intereses das empresas concesionarias son decisións que este goberno local esta a manter e que son herdadas de mandatos anteriores prolongadas no tempo e que están levando a situación xeral da cidade a un camiño insostible por moito que aparencialmente o PP e o PSOE se esforcen en cuestionarse mutuamente«.