O alcalde animou aos alumnos do Carballo Calero a continuar cos seus “pequenos pero grandes” proxectos

Un grupo de alumnos do IES Carballo Calero que participan na First Lego League, acompañados da súa profesora de tecnoloxía e da directora do centro, visitaron esta mañá o pazo municipal para presentarlles ao alcalde,
Ángel Mato, e á concelleira de Obras e Servizos, Ana Lamas, algúns dos seus proxectos e interesarse polo funcionamento do Concello.

Foron recibidos no salón de plenos, onde o rexedor, compartiu reflexionou con eles sobre as implicacións que a robótica terá nun futuro moi próximo e a importancia de que “sendo tan novos” se familiaricen con estes sistemas. “Enfrontádesmos a moitos retos”, díxolles Mato para sinalarlles que moitos deles terán que ver con que sexan capaces de buscar solucións “a través da innovación”. Por iso, animounos a traballar arreo nos “pequenos pero grandes proxectos” que están a desenvolver coa axuda dos seus profesores.

O alcalde aseguroulles que para el “é moi importante” que o visite xente nova, porque soe recibir, dixo, a persoas “máis maiores”, con diferentes perspectivas, e considera imprescindible ter en conta as ideas dos máis novos. De feito, os rapaces fixéronlle varias preguntas acerca dos proxectos que ten o goberno local en diferentes materias, como a medioambiental. Ángel Mato aseguroulles que tamén á hora de abordar este tipo de “problemas serios” desde un concello “se pode traballar”, sobre todo para “facer cidades mellores”.