O pleno de Ferrol aproba a Ordenanza Xeral de Subvencións

O Concello de Ferrol celebrou esta mañá tres plenos extraordinarios. O primeiro aprobou as normas para o sorteo da composición das mesas electorais para as eleccións xerais do próximo 10 de novembro. O segundo rexeitou a moción presentada polo grupo municipal do Partido Popular que demandaba a adopción urxente de medidas que salven o futuro da Central Térmica das Pontes e, en caso de non suceder, a dimisión de Teresa Rivera, ministra en funcións para a Transición Ecolóxica.

A proposta contou cos votos a favor do PP e en contra os de PSOE, FeC e BNG. Julián Reina, voceiro do grupo socialista, presentou unha emenda á moción popular para, por unha banda, instar á posta en marcha de iniciativas para a “reactivación industrial” que aproveite “todas as potencialidades da comarca” e, por outra, trasladar dita proposta ao Goberno central e á Xunta. A emenda socialista non foi aceptada polo grupo municipal popular.

Cos votos a favor de PSOE e FeC, en contra os de BNG e 8 abstencións do PP, o terceiro pleno extraordinario aprobou a Ordenanza Xeral de Subvencións e desestimou a alegación do grupo municipal do BNG.