O Concello aproba unha declaración institucional en apoio á campaña “20S Emerxencia Feminista”

O Concello de Ferrol súmase ao apoio á campaña “20S Emerxencia Feminista” que alerta do incremento da violencia de xénero durante o verán, máis aínda despois do episodio do pasado luns en Valga (Pontevedra) co triplo asasinato machista de tres mulleres da mesma familia. Durante a xunta de voceiros de hoxe todos os grupos políticos da corporación (PSOE, PP, FeC e BNG) aprobaron unha declaración institucional e o seu apoio ás mobilizacións convocadas polo movemento feminista no noso país. Tamén acordaron implementar novas medidas nos vindeiros anos así como poñer en andamento programas que impulsen a igualdade de xénero en Ferrol e que loiten contra a violencia machista.

Os voceiros acordaron solicitar do goberno autonómico un incremento dos recursos económicos destinados a loita contra a violencia machista no vindeiro exercicio orzamentario así como a aprobación de partidas económicas para dotar de máis persoal especializado en violencia de xénero os medios que existen. A xunta de voceiros acordou tamén demandar do goberno central un incremento das contías económicas destinadas á administración local no Pacto de Estado para os vindeiros exercicios orzamentarios. Por último, a corporación adquiriu o compromiso de iluminar esta noite de cor violeta a fachada do Concello de Ferrol como mostra de compromiso na loita contra a violencia machista.

O texto da declaración institucional, que se lerá no próximo pleno, recolle que “o verán de 2019 vai ser recordado como un verán negro” e lembra que “no pasado mes de xullo asasinaron unha muller cada dous días”. Ademais, o texto defende “facer unha aposta por achegar máis medidas que axuden a unha transformación social urxente” e que “debiliten a cultura patriarcal que violenta e asasina a moitas mulleres”.