Galicia Ártabra Digital Noticias de Ferrol y la comarca de Ferrolterra.
O Concello de Ferrol xa ten preparadas as actividades de balde que ofrecerá este outono a capela do centro cultural Torrente Ballester (rúa Concepción Arenal s/n) no marco do programa Apego, de Normalización Lingüística, dirixido a fomentar e mellorar a transmisión da lingua galega. Durante os meses de outubro e novembro as actuacións terán lugar os martes ás 18.30 horas e xa en decembro se celebrarán os domingos ás 12 horas.
O programa arranca o próximo 22 de outubro con “Camiños”, da compañía Magin Blanco, para familias e nenos ata 6 anos. É un espectáculo musical onde conflúen música, teatro, poesía e contos para estimular e enriquecer a imaxinación dos rapaces cun repertorio moi bailable.
O día 29 de outubro o Torrente acollerá o contacontos para nenos de 3 a 8 anos “Contos para un mundo mellor”, con Gloria Mosquera e Diego Maceiras no acordeón. Tratarán temas como o medo, o coidado da natureza, o saber dicir non e facendo reflexionar sobre a importancia da empatía, prudencia, da superación persoal, da cooperación e da responsabilidade como necesarios mecanismos de paz e felicidade.
Xa en novembro, o martes 5 celebrase o obradoiro “Disciplina Positiva” como modelo educativo para entender o comportamento dos nenos e a forma de abordar a súa actitude de forma positiva, afectiva, firme e respectuosa. Ofrecerá ferramentas desde a lingua galega para a crianza. Neste caso é necesaria a inscrición previa.
O día 12 de novembro celébrase para nenos de 3 a 8 nenos a cargo da compañía Xarope Tulú “O Cardume”, un espectáculo que combina a narración oral coa música en vivo. Unha narradora e un músico achégannos historias onde as personaxes levan a diversidade como bandeira e a través dos obxectos e melodías iremos descubrindo un mundo onde todas sumamos.
O martes 19 de novembro o Torrente Ballester acollerá para nenos de ata 4 anos “Danzacontos, historias en movemento”, un obradoiro a cargo de Laura Martínez Rei para conectar coas crianzas a través da linguaxe corporal, os aloumiños, a respiración, a música e o ritmo. Neste caso é necesaria a inscrición previa.
No mes de decembro, o día 1 celébrase para familias e nenos ata 8 anos “O lobo e a lúa”, un espectáculo teatral da compañía Baobab Teatro onde os seus personaxes conviven a pesar das súas diferenzas. Un espectáculo que transcorre sempre de noite, á luz da lúa, unha historia de amizade, amor e superación dos propios medos.
Por último, o domingo 8 de decembro, familias e nenos de entre 3 e 8 anos poderán gozar da actuación “Misterio de Nadal”, da compañía Polo Correo do Vento. Trátase dun contacontos e música no que dous nenos son moi fans de Sherlock Holmes. Algo estraño sucede en Nadal na súa vila e comezan unha investigación.
Actuación teatral “Cinco minutos sen respirar”
Ao Concello de Ferrol, por formar parte da Rede de Dinamización Lingüística, asignóuselle o espectáculo teatral “Cinco minutos sen respirar”, neste caso dentro das actividades de dinamización lingüística e organizado en colaboración coa Secretaría Xeral de Política Lingüística da Xunta e no marco do programa de actividades Nós contra a violencia. Será de balde tamén no Torrente Ballester o próximo día 3 de novembro ás 18.30 horas.
