Galicia Ártabra Digital Noticias de Ferrol y la comarca de Ferrolterra.
Os centros de educación infantil e primaria (CEIP) teñen aberto o prazo de inscrición nas actividades extraescolares para o curso 2019/2020 organizadas pola concellería de Educación do Concello de Ferrol nos dez colexios públicos da cidade: A Laxe, Cruceiro de Canido, Esteiro, Isaac Peral, Juan de Lángara, Manuel Masdías, Pazos, Ponzos, Recimil e San Xoán.
Estas materias darán comezo o próximo 1 do outubro, e para entón cada centro escolar ten que ter mandado ao Concello as peticións das familias na última semana de setembro. Para elo, os colexios elixiron, xa desde o anterior curso, entre as 36 materias que ofrece a concellería que dirixe Antonio Golpe: gaita galega, percusión tradicional, iniciación á música, patinaxe, baile moderno, baile galego, debuxo e pintura, teatro, xogos cooperativos e tradicionais, ximnasia rítmica, capoeira, chinés, francés, karate, judo, fotografía, informática e internet, manualidades, fútbol, alemán, lingua de signos, técnicas de estudio, habilidades sociais e de comunicación, redes sociais, emprendimento e habilidades cooperativas, creatividade, guitarra, xogos de mesa, informática musical, risoterapia, pilates, conta contos, xardíns e semilleiros escolares, hortos e semilleiros escolares, hip hop e baloncesto. Ademais, hai catro máis a proposta dalgúns centros, como é zumba, creatividade e xogos tradicionais, xogos de mesa e cooperativos e creatividade e contacontos. O número de actividades que se asigna a cada CEIP vai en función do número de alumnado.
As actividades extraescolares máis demandadas este ano foron patinaxe, seguida de baile moderno, kárate e hip hop.
Reunión do concelleiro coa Feanpas
Despois de que representes da Federación de Asociacións de Nais e Pais de Alumnos de Ferrolterra (Feanpas) solicitaran a pasada semana ao concelleiro Antonio Golpe manter unha reunión con el, este encontro produciuse o pasado mércores, coincidindo co inicio do colexio. O edil quixo darlles a coñecer de primeira man a programación das actividades que ofrece o Concello para o curso escolar 2019-2020.
Ademais dun nutrido programa de actividades extraescolares, a área de Educación mantén o servizo de comedores e o programa “Xadrez nas escolas” para os dez CEIP e os once centros concertados da cidade.
