Galicia Ártabra Digital Noticias de Ferrol y la comarca de Ferrolterra.
Marea de Cabanas remitiu un comunicado no que sinala que «o alcalde de Cabanas non convocou o Pleno ordinario de xullo que tería que ter lugar este mércores 31 de xullo ás 19.30 h segundo a periodicidade de celebración en meses impares establecida o pasado 29 de xuño».
O portavoz da Marea de Cabanas, Xosé Manuel Pérez Sardiña, resaltou que «a negativa a convocar este pleno ordinario, cando é preceptivo legalmente, implica un grave quebranto ao dereito fundamental de participación na actividade pública municipal tanto da veciñanza como dos edís da Corporación».
Pérez Sardiña considerou que non se debe permitir «este déficit democrático do que é responsable o grupo de goberno de Cabanas composto pola coalición PSOE-BNG-AEC», engadindo que «esta omisión do pleno ordinario é para non dar contas sobre un proceso selectivo de persoal temporal pouco transparente e que o goberno local leva un mes tratando de pechar en falso».
Convida ao goberno local a «reflexionar, abandonar a prepotencia e garantir a diversidade de opinións na corporación», dixo o edil da Marea de Cabanas. Por iso, o voceiro esixe que o alcalde convoque o Pleno ordinario e «paren xa as decisións caciquís».
