O Concello colabora coa Asociación de Torneiros da Madeira Virutas na organización do “III Encontro de torneiros de madeira”

O Concello de Narón e a Asociación de Torneiros da Madeira Virutas organizan unha nova edición, a terceira, do Encontro de torneiros de madeira Virutas, que terá lugar este venres e o sábado na nave da Ferretería Canaima, na rúa Basanta s/n (Ferrol). A convocatoria coincide coa “VI Feira de Maquinaria” que se desenvolve na mesma ubicación.

As persoas que desexen asistir poderán facelo este venres, entre as 10.00 e as 13.30 e de 14.00 a 17.30 e tamén na xornada do sábado, de 10.00 a 13.30 e de 14.00 a 19.30 horas. A música porá o broche final a esta convocatoria, na que se sortearán varios agasallos entre os asistentes antes de proceder á clausura, á que asistirá a alcaldesa da cidade, Marián Ferreiro.

Nunha superficie duns trinta metros cadrados poderán expoñer os seus traballos aqueles torneiros interesados para participar neste Encontro. O presidente da asociación Virutas, Adolfo Mira, explicou que, ao igual que en anteriores edicións, “haberá demostracións en vivo de torneado e contaremos coa presenza dun torneiro profesional, Xavier Martín, de Miño”. As persoas que se acheguen ata a nave na que se desenvolve o evento poderán ver unha gran variedade de pezas torneadas de madeira e tamén todo tipo de ferramenta e maquinaria de torneado, así como algunhas publicacións relacionadas con este tipo de actividade.

O presidente de Virutas avanzou que xa teñen confirmada a súa asistencia representantes da Asociación Amigos da Madeira, das Pontes, e tamén outros representantes de entidades da comarca e persoas a título individual, algunhas delas procedentes doutras provincias españolas, como Rafael Alonso, de Palencia.

Varios torneiros asociados a Virutas amosarán unha serie de pezas únicas realizadas na cidade, dando así a coñecer o traballo que realizan desde Narón, donde iniciaron a súa andaina hai xa dous anos.

A entrada é de balde e tanto desde a asociación como desde o Concello animaron á cidadanía a asistir para ver as pezas que realizan os profesionais da madeira e tamén as últimas novidades en maquinaria para tornear.