O goberno de Ferrol aproba a adxudicación das obras de aglomerado do Camiño de Marmadeiro e do Camiño de Piñón

A Xunta de Goberno Local celebrada esta mañá aprobou a adxudicación das obras de aglomerado do Camiño de Marmadeiro (a e b) e do Camiño de Piñón (ambas incluídas no POS+ 2017) á empresa Lancer Proyectos y Obras S.A. por un importe de 25.539, 59 euros (IVE incluído). O prazo de execución das obras é dun mes desde o seu inicio.

Así mesmo, aprobou o expediente e os pregos administrativos e técnicos para a contratación do servizo de asistencia técnica de apoio á execución do proxecto MMIAH “Maritime, Military and Industrial Heritage”, cofinanciado polos fondos FEDER, por un importe de 55.663,69 euros (IVE incluído), repartido en tres anualidades: 2018, 2019 e 2020.

Este proxecto ten como obxectivo a posta en valor do borde litoral urbano do Espazo Atlántico a través da recuperación de bens en desuso asociados ao patrimonio militar, marítimo e industrial das cidades costeiras, facilitar o uso social dos mesmos e xerar actividades de valor engadido en torno a eles co fin de promover o turismo cultural como factor de sostenibilidade económica.

Por último, a Xunta de Goberno Local aprobou o recoñecemento extraxudicial de cinco facturas por un importe global de 10.569,20 euros, co que se mantén a tendencia a unha redución constante dos importes recoñecidos por esta vía.