Sainza Ruiz presenta novas actividades na Casa da Muller

Unha das actividades mais novidosas e agardadas e mesmo demandadas de entre todos os obradoiros de balde que puxo en marcha neste 2018 a Concellería de Muller e Igualdade na Casa da Muller está a piques de arrancar.

Trátase de Ecorredes-Sendeirismo, unha proposta con dúas rutas diferenciadas pola nosa contorna: A Cabana e Doniños, con saída desde a propia Casa da Muller, na que poden tomar parte as mulleres, cos fillos e tamén coas súas mascotas se así o desexan en calquera das rutas de oito quilómetros que se ofertan.

Así o anunciaba hoxe en rolda de prensa a concelleira de Benestar Social, Muller, Igualdade e Mocidade, Saínza Ruiz, que daba conta polo miúdo desta iniciativa que vai percorrer a contorna natural de Ferrol os sábados nas fins de semana do mes de xuño con mais de 200 mulleres inscritas dentro das actividades ofertadas desde a Casa Da Muller de Ferrol organizadas de balde.

Doutra banda, indican que a petición das propias mulleres, logo de facerlles cegar unha consulta, os obradoiros de balde nos que participan terá continuidade no mes de xuño e se retoman en setembro, a diferencia dos anos anteriores nos que se producía un parón de maio a outubro, mostra do bo desenvolvemento dos mesmos e do interese da usuarias por darlles continuidade.

O LUNS ABRE O PRAZO PARA ANOTARSE NO OBRADOIRO ‘Quero vender on-line!, NA CASA DA MULLER

A concelleira de Muller e Igualdade avanzaba tamén que este luns 4 ábrese o prazo para anotarse no obradoiro ‘Quero vender online’, un curso formativo de 35 horas para o que se ofertan un total de 15 prazas sen ningún custo.

O prazo remata o 15 de xuño e as interesadas teñen que presentar a súa solicitude no horario habitual, de 9 a 14 horas, no Rexistro Municipal. Impartirase os mércores e os sábados de 10 a 14h (comezarán o mércores 20 de xuño) na Casa da Muller, na rúa Lugo.

Vai dirixido a mulleres empadroadas no Concello de Ferrol que teñan tenda física e queiran aprender a vender por internet, e para mulleres que tendo ideas de produtos non teñan o coñecemento nin as ferramentas para construir a súa tenda on-line.

Traballarase coas diversas redes sociais que poden utilizarse como ferramentas de venda de produtos, e se amosarán diversos programas como Virtual Composer para o deseño e maquetación de webs de tendas on-line ou o manexo da plataforma WooComerce (plataforma de tenda on-line de wordpress).

CURSO DE MONITORES DE TEMPO LIBRE

Para rematar, a concelleira informou da boa marcha do curso de monitores de tempo libre que se imparte na Casa da Xuventude e que no participan un total de 25 mozos e mozas. Dentro da parte práctica do curso, os alumnos realizarán esta fin de semana unha acampada con pernocta no local da Asociación Vecinal de Covas.

O remate do curso e a entrega de diplomas está previsto para o 17 de xuño.