Fene avanza a súa programación cultural primaveira-verán

Oswaldo Digón, Paco Cerdeira, Bellón&Maceiras e María Larraitz, son algúns dos artistas que pasarán pola Casa da Cultura de Fene esta primavera, segundo adianta a Concellería de Cultura de Fene. O departamento que dirixe o edil Justo Ardá anuncia tamén as actividades e espectáculos previstos para o Ciclo do Día da Patria Galega que terá lugar no mes de xullo e polo que pasarán este ano Circo Chosco, Nautilus Band, Ith e Sés.

A Biblioteca Municipal de Fene acollerá no mes de maio un ciclo de actividades dirixidas ao público familiar que incluirá dous concertos e unha sesión de contacontos. A primeira das actuacións, “Pakolas en concerto”, anúnciase para o mércores 2 de maio e correrá a cargo do popular Paco Cerdeira con “cancións para rockear, para soñar, para non parar de mover o esqueleto e tamén sobre todo, para aprender”.

O mércores 9 de maio actuará na Biblioteca de Fene o dúo Bellón & Maceiras. Nesta ocasión, Daniel Bellón e Diego Maceiras ofrecerán un concerto dirixido especialmente aos/ás nenos/as, aos/ás que darán a coñecer instrumentos e ritmos autóctonos, amais de tentar involucralos coa súa música e animalos a coñecer algo máis da súa cultura .

O ciclo concluirá o mércores 16 de maio con María Larraitz e os seus “Babacontos con María Moreno”. Neste espectáculo que emprega as ferramentas da narración oral tradicional, a actriz e contacontos María Larraitz dará a coñecer algunhas das historias do libro Mar adiante, así coma contos/poemas de Eu conto, ti cantas…, da escritora María Victoria Moreno, autora homenaxeada este ano no Día das Letras Galegas.

Tamén no mes de maio, a Concellería de Cultura de Fene conmemorará o Día dos Museos no Museo do Humor cun espectáculo a cargo do actor e monologuista Oswaldo Digón o 18 de maio. Fundador da primeira compañía de Teatro de Improvisación en Galicia, Oswaldo Digón traballou como monologuista no programa Luar da TVG e tamén ten participado na xira de “Las noches del club de la comedia” onde compartiu cartel cos humoristas Dani Rovira, Queque e Joaquín Reyes.

De cara ao verán, a Concellería de Cultura de Fene adianta as actividades previstas para o Ciclo do Día da Patria Galega que comezará o luns 9 de xullo cunha actuación de Circo Chosco (Ariñe Azkue e Óscar Páez) na Praza do alcalde Ramón Souto González. Neste espectáculo, Forzu2, “o humor e o absurdo son os fíos que tecen a trama na que dous atletas se compenetran realizando trucos imposibles diante do público. Risco, desastre, sorpresa e surrealismo crúzanse coa impecable técnica en forma de portés, acrobacias aéreas, malabares imposibles e lume”.

O humor dará paso á música na xornada do martes 10 de xullo. Ese día actuará na Praza do Concello o grupo de rock en galego Ith, presentando o seu disco O mínimo que o contén todo. Miguel (guitarra), Toxo (baixo), Gonzalo (batería), Lucía (voz) e Miguel Folgueira (voz) son os compoñentes desta banda, natural de Xanceda, que toma o seu nome dun príncipe celta. A música de Ith amosa influenzas de diversos grupos do rock, do heavy ou do pop, tanto estatal como internacional. A temática das cancións “vai dende a sempre presente reivindicación, necesaria en toda sociedade, ata o máis puro sentimento e emoción”.

O Ciclo do Día da Patria Galega 2018 continuará o xoves 12 de xullo coa xa tradicional Festa da Veciñanza que incluirá unha verbena arrufada pola orquestra Nautilus Band.

O programa pecharase o venres 13 de xullo cun concerto de Sés no que a artista coruñesa presentará o seu quinto traballo, Readmirando a condición. Neste álbum, Sés volve gravar, musicar e arranxar o seu primeiro disco, «Admirando a condición», que publicara en 2011.

Lea también

El proyecto europeo COVALEX, liderado por la UDC, Campus Industrial, analizó los resultados de tres simulacros de rescate

La profesora de la Escuela Politécnica de Ingeniería de Ferrol (EPEF) e investigadora individual del …