As categorías base do Amistade de Meirás enfróntanse á selección do WSF All Star

O campo municipal de Atios será escenario este sábado, 24 de febreiro, de dous encontros do máis alto nivel entre os equipos sub 14 e sub 16 do Amistade de Meirás e as seleccións do WSF All Star, chegados de Miami. A World Soccer Foundation (WSF) é unha institución adicada á promoción mundial do fútbol xuvenil ó máis alto nivel e as formacións que presentará en Valdoviño están integradas polos máis destacados talentos da Miami Cup 2017. Iniciarán esta semana unha xira por España que os levará a enfrontarse contra equipos de Madrid e tamén da provincia da Coruña. Entre eles, o Amistade de Meirás.

Dende a Concellería de Deportes que dirixe Sergio Saavedra, anímase á veciñanza a achegarse ata o campo de fútbol municipal e animar ás categorías base locais. Apunta que a entrada é gratuíta e que os encontros comezarán ás 18 horas no caso dos sub 14 e ás 19,30 horas saltarán ó terreo de xogo os sub 16.