O Concello de Fene aproba a Oferta de Emprego Público para a cobertura de 6 postos de traballo

O goberno local de Fene reuniuse esta mañá con representantes dos grupos da oposición, da Xunta de Persoal e do Comité de Empresa, ademais da parte sindical da CIG, CSIF e UGT, para dar conta da proposta de Oferta de Emprego Público no Concello de Fene correspondente a esta anualidade. O catálogo presentado polo equipo de goberno obtivo o apoio maioritario da Mesa Xeral de Negociación que, deste xeito, lle dá luz verde á convocatoria de 6 prazas para a cobertura doutros tantos postos en distintos departamentos municipais.

A aprobación da oferta pública é o paso previo ao inicio dos respectivos procesos de contratación e debe ser ratificada e publicada antes do 31 de decembro de cada ano para que se poida recorrer a ela xa ao ano seguinte. De feito, unha vez aprobada a OEP, os concellos teñen un máximo de tres anos para cubrir as prazas ofertadas.

Iso si, nestes momentos a administración ten limitadas as posibilidades por lei tanto para a convocatoria de novos postos como para a reposición de persoal por causa, principalmente, das xubilacións.

Así, o Estado só permite repoñer nun 50% as vacantes existentes en servizos de carácter xeral e a posibilidade do 100% so está prevista de momento para postos relacionados cos servizos esenciais, como é o caso daqueles que teñen que ver coa seguridade cidadá, a sanidade ou a educación, entre outros.

Neste escenario, o executivo local presentou na Mesa Xeral de Negociación unha proposta que declara como dispoñibles dúas prazas para persoal funcionario de novo ingreso -unha de auxiliar administrativo e outra de peón- e outros catro postos de administrativo que se cubrirán mediante promoción interna.

O alcalde, Juventino Trigo, louvou esta mañá «a boa disposición» da Mesa integrada por representantes dos partidos políticos, dos sindicatos, da Xunta de persoal e do Comité de empresa «para levar adiante unha oferta pública que é moi necesaria para cubrir xubilacións que se produciron nos últimos anos, pero tamén para reforzar a área administrativa do Concello«. O rexedor destacou que a proposta ratificada esta mañá «por unha ampla maioría da Mesa» é, ademais, «a primeira que se aproba en Fene nos últimos 8 anos«.

A intención municipal é «acelerar os procesos selectivos todo o que se poida» dentro dos prazos que permite a lei, coa finalidade de «continuar axeitando a capacidade do Concello para prestar os servizos que demanda a veciñanza«.

Lea también

El «RallyShow Deputación da Coruña» llenó el circuito de As Pontes en una jornada vibrante para el motor gallego

El circuito municipal de As Pontes vivió este sábado, día 30,  una jornada histórica con …