O PSOE amosa a súa satisfacción pola ampliación da estrada de San Xoán de Filgueira da man da Deputación

O Partido Socialista de Ferrol congratúlase do «bo traballo feito» a través da Deputación de Coruña tras confirmarse que esta acometerá as obras de mellora e ampliación da estrada de San Xoán de Filgueira ata Catabois, por un importe de 800.000 euros.

Os traballos consisten na mellora e ampliación de ancho de vía San Xoán de Filgueira ata Catabois. Asimesmo, inclúese tamén a renovación de servizos de abastecemento e saneamento afectados, que fora unha das principais demandas das veciñas e dos veciños.

A voceira socialista, Beatriz Sestayo remarca «fronte á inactividade do Goberno Municipal, o Partido Socialista de Ferrol, xunto ao goberno da Deputación da Coruña, somos os que estamos a executar inversións importantes e necesarias para a veciñanza de Ferrol«.

Esta obra engádese á da execución da segunda fase da mellora e ampliación da estrada de Serantes ata A Cabana, cun orzamento de 636.000 euros, que tamén foi confirmada hai poucos días polo Partido Socialista de Ferrol.