Arranca o curso de formación en técnicas de froitocultura do Concello de Cabanas

Un total de 21 veciños e veciñas de Cabanas e tamén doutros municipios da comarca participan dende esta semana no Curso de Formación en Técnicas de Froitocultura que organiza o Concello a través da Concellería de Educación e Cultura. O salón de plenos da casa consistorial acolle as sesións, que arrancaban onte pola tarde. Celebraranse todos os xoves en horario de tarde, de 18 a 20 h, e prolongaranse ata o próximo 25 de xaneiro.

Tempo no que os participantes poderán aprender todo o necesario para o cultivo de froiteiras, as súas variedades, coidados, enxertos, enfermidades e tratamentos fitosanitarios ou tarefas de poda.