Arrancan as obras de construción do Circuito de Motocross do Concello de Cabanas

O alcalde, Germán Castrillón, realizou unha visita de supervisión ás obras de construción do Circuito Municipal de Motocross do Concello de Cabanas. Unha actuación que arrancaba a semana pasada nunha parcela municipal de 14.770 metros cadrados ubicada no polígono de Vilar do Colo. O rexidor destacou que Cabanas se convertirá no primeiro municipio da comarca e nun dos poucos da provincia en dispor dunhas instalacións municipais deste tipo e, por iso, o obxectivo do Concello non é outro máis que facer de Cabanas un auténtico referente do mundo do motor.

Con ese horizonte, explica que o Concello quere poñer a disposición de mozos e mozas un circuito onde poder competir a prezos máis asequibles e no que se formen pilotos de alto nivel.

As obras que agora comezan son fruto, segundo sinala o alcalde, dun traballo de moitos meses. Un traballo de tramitación administrativa que incluía a obtención de diversos permisos –Patrimonio, Medio Ambiente ou Augas de Galicia- e, especialmente, de búsqueda de financiamento para lograr minimizar os custes para as arcas municipais. E así foi, xa que a Secretaría Xeral para o Deporte implicábase no proxecto e, mediante un convenio, asumía o 100% do orzamento, que ascende a 25.000 euros.

O Circuito contará cunha pista de 672,25 metros de lonxitude e 8 metros de ancho, a excepción da saída, onde a pista terá unhas medidas de 50 de longo por 12 de ancho. O prazo de execución estímase nun mes.