Galicia Ártabra Noticias de Ferrol y la comarca de Ferrolterra.
A proba, organizada por Arco Narón, está dividida en 14 categorías, desde prebanxamíns ata absoluta, e desenvolverase durante todo o día.
O pavillón polideportivo da Gándara acolle este sábado 24 de outubro, o XXI Trofeo Cidade de Narón de Tiro con Arco, unha competición na que están inscritas 94 persoas repartidas en 14 categorías, desde prebanxamíns (menores de 8 anos) ata a categoría absoluta, que inclúe senior e veteranos.
A alcaldesa de Narón, Marián Ferreiro, presentou o evento xunto ao vicepresidente do club Arco Narón, Anxo Grandal, e o tesoureiro, Víctor Matesanz. “Para Narón é un orgullo acoller de novo esta proba”, dixo Ferreiro. “Un ano máis, a Gándara énchese de deportistas de todas as idades, e iso fala tanto do club organizador como da afección que hai ao tiro con arco na nosa cidade”.
A xornada principiará ás 9.00 horas coa recepción de participantes, e a competición dará comezo arredor das 9.20 horas coas categorías inferiores, ata sub18, que recollerán os trofeos ao remate das probas, previsto para o mediodía. Ás 14.15 horas será a quenda dos adultos, coa previsión de rematar ao redor das 20.00 horas coa entrega dos respectivos trofeos.
En total competirán en Narón 17 clubs, 16 deles de Galicia e un de Asturias. Grandal referiuse tamén á maior presenza de mulleres nas categorías inferiores, nas que son maioría, e indicou que no club naronés a distribución por sexos está xa case no 50%.
