Adxudicada a construción do Circuito de Motocross do Concello de Cabanas

O Concello vén de adxudicar a construción do Circuito de Motocross no municipio de Cabanas. Unhas instalacións pioneiras na comarca que aspiran a converterse en referente da zona norte de Galicia, segundo explicou o alcalde de Cabanas, Germán Castrillón. A intervención, orzamentada nuns 25.000 euros, será financiada ó 100% pola Xunta de Galicia, a través da Secretaría Xeral para o Deporte vía convenio de colaboración.

Así mesmo, o rexidor avanzou que os traballos comezarán nos próximos días. O circuito emprazarase nunha parcela municipal de 14.770 metros cadrados no polígono de Vilar do Colo e contará cunha pista de 672,25 metros de lonxitude e 8 metros de ancho, a excepción da saída, onde a pista terá unhas medidas de 50 de longo por 12 de ancho.

Trátase dun proxecto no que o Concello leva traballando moito tempo e que busca convertir a Cabanas nun referente do mundo do motor na provincia, ó dispor dunhas instalacións municipais onde os mozos e mozas poderán competir a prezos máis asequibles e que permitirá formar a pilotos de alto nivel, xa que o motocross é, xunto ó karting, a verdadeira escola do deporte base para o automobilismo deportivo.

Tras obter os correspondentes permisos –Patrimonio, Medio Ambiente ou Augas de Galicia-, o alcalde explicou que o Concello traballou para buscar a implicación doutras administracións na financiación da actuación. E esas xestións culminaron co citado convenio coa Secretaría Xeral para o Deporte.