Baloncesto de nivel no Torneo 3×3 de Cabanas

O baloncesto foi protagonista a pasada fin de semana da axenda deportiva da comarca da man do Torneo 3×3 Concello de Cabanas. Un ano máis, e con este van once, os amantes deste deporte tiveron unha cita obrigada no municipio. A cancha do parque do Areal acolleu durante a fin de semana a nova edición desta competición, que conseguiu superar as mellores expectativas de afluencia.

O equipo Los vaqueros, integrado por xogadores do BC Eume como Lois Villar, David López, Rogelio Bandín- que se fixo co trofeo MVP- Pablo Alejo e Antón Amado, proclamouse vencedor por segundo ano consecutivo, ao imporse nunha axustada final ao Venimos en son de paz. Na categoría feminina, Las chonis, con Belén Lanzas, Nerea Nieto, Silvia e Blanca Millán, xogadora esta última que ten sido convocada pola Selección Española, mostraron con claridade a súa superioridade, gañando todos os partidos que disputaron.

Por primeira vez na historia deste torneo, unha xogadora, Nerea Nieto, impúxose no concurso de triples. Finalmente, o concurso 1vs1 non deparou grandes sorpresas, e nel o trunfo foi Mario Castro, favorito dende o comezo.

Un total de 24 equipos participaron este ano na competición que, debido ao mal tempo tivo que celebrar os seus primeiros partidos no pavillón de Pontedeume. Con esta nova edición, o de Cabanas consolídase como o mellor 3×3 de baloncesto de Galicia. A competición, organizada por un grupo de mozos do municipio que comparten a súa afección por este deporte (Jaime García, Tomás Novoa, Pablo Seijas, Miguel Regueiro, Luis Díaz, Pedro Díaz, Alberto Regueiro, Ángel Nael, Íñigo Blanco e Joshua Gallagher) conta coa colaboración do Concello de Cabanas, a través da concellería de Deportes.