O alcalde de Narón aclara que o propio título da moción presentada no pleno sobre as vítimas do terrorismo cita a Miguel Ángel Blanco

«O alcalde de Narón, José Manuel Blanco, lamentou o feito de que o portavoz do PP de Narón acuda unha vez máis á mentira para desinformar á cidadanía, enganándoa conscientemente unha vez máis e, neste caso, utilizando un tema como a violencia terrorista«, sinala nun comunicado  o gabinete de prensa  do conecello naronés.

«O popular asegurou que o grupo de goberno non presentou unha moción ao respecto, senón EU, e que na mesma non se cita o nome do edil do PP en Ermua Miguel Ángel Blanco, asasinado pola banda terrotista ETA no País Vasco hai vinte anos. A realidade é que a moción está asinada polo tripartito naronés –TEGA, PSOE e BNG- e polo edil de EU (Grupo Mixto) e que no propio título, tal e como se pode constatar no expediente e nas actas, cita a Miguel Ángel Blanco”, asegurou o alcalde.

A maiores, en canto ao contido, o rexedor local incidiu en que se o portavoz popular se tivese molestado en ler a moción aprobada no pleno sobre a violencia terrorista, “vería que xa no título di: “Moción en homenaxe a todas as vítimas do terrorismo no aniversario do asasinato a Miguel Ángel Blanco”. As alusións ao concelleiro popular asasinado por ETA sucédense no texto da moción presentada polo grupo de goberno de Narón e EU, na que se condena firmemente “a violencia terrorista en todas as súas formas ao longo da historia”. Na sesión plenaria do pasado xoves gardouse ademais un minuto de silencio “en lembranza e homenaxe a todas as vítimas do terrorismo”.

“É unha lástima que unha persoa elixida por algúns veciños e veciñas de Narón para representalos no Concello recurra constante e conscientemente á mentira utilizando calquera tema, incluso a violencia terrorista como nesta ocasión”, denunciou Blanco. O alcalde asegurou que á vista das declaracións que realiza o portavoz do grupo municipal do PP na cidade “semella que confunde continuamente o que a el lle gustaría que acontecese coa realidade”.