Ferrol baila na rúa

Ferrol Baila, e bailará a vindeira fin de semana coa II edición de Vai de Baile, o festival de Danza Urbana que, como novidade, se estende de Ferrol a Neda, dentro do programa Danza en Rede, financiado polo Agadic.

Vai de Baile volta con esta segunda edición, que promete herdar o éxito que xa tivo a primeira. Arranca o 30 de xuño, na rúa Real de Neda e móvese ao centro de Ferrol os días 1 e 2 de xullo, ocupando distintos espazos urbanos non habituais nos circuítos culturais pero emblemáticos e senlleiros nunha nova aproximación da cultura as rúas na liña do programa deseñado desde a Concellería de Cultura para este mes de xuño, na liña de II Fóra do Mapa e EsteNaRúa.

A presentación, este mediodía no Concello, contou coa participación do concelleiro de Cultura, Suso Basterrechea, e de Copy Villaamil, técnica de Cultura do Concello de Neda. Neste segundo asalto do VdeB, expuxeron, apostase polo poder danza para transformar a nosa percepción cotiá do espazo público.

“O feito dancístico, sacado do seu contexto habitual e trasladado aos nosos espazos de convivencia, fai que nunca máis volvamos a ver ese lugar do mesmo xeito. A pegada do movemento na nosa retina vainos acompañar sempre”, explica Roberto Taboada, coordinador do ciclo.

“Este segundo asalto”, manifestou Basterrechea, “afonda na visibilización da muller traballadora e artista, nunha disciplina ben sacrificada, xa que todas as propostas son creadas e interpretadas polas súas propias coreógrafas (aínda que hai unha pequena concesión nos dous dúos que se presentan, onde eles tamén están presentes). A presenza feminina tamén está na imaxe do cartaz, na fotógrafa – Malena Carballo- que foi quen de captar ese momento tan elocuente, na composición dos materias gráficos – Paula García-, na asistencia de produción –Cristina Montero- e ata no voluntariado.

Unha edición netamente feminina, que vai a ocupar con movemento lugares coma Amboaxe, o Cantón, a Praza de Ferrol Vello, os xardíns do Centro Torrente Ballester e tamén espazos non escénicos coma a sala Carlos III de Exponav ou o inédito espazo do museo da Costa de Mella. Ademais de feminino é unha edición marcada pola ferrolanidade, xa que recupera e presenta a dúas coreógrafas que teñen uns lazos moi estreitos con Ferrol: Irene Vázquez e Ana Endorzain. Atraemos a Ferrol a dúas galegas que están a desenvolver o seu traballo noutros lugares da Europa: Janet Novás e Begoña Cuquejo.

Por outra banda, a II edición de Vai de Baile conta, en estrea absoluta, coas as pezas de dúas creadoras galegas: Nuria Sotelo e María Move e non deixamos de ollar ao outro lado do Atlántico, presentando dous traballos, un dende Costa Rica e o outro é o gañador do premio do festival “SóloDos” de Costa Rica, que achega a unha compañía de México.

Finalmente, coma unha especie de continuidade de programación, unha vez rematada a segunda edición de Vídeo Clips A Esgalla, comezamos o VdeB coa estrea dunha peza audiovisual –Cadencia- de Virginia Rota, sobre o traballo de corpo de Janet Novás.

Vai de Baile é socio fundador da rede de festivais de danza en espazos urbanos de Galicia CompliCIDADES, da que forman parte catro festivais, un de cada provincia galega: Corpo(a)terra de Ourense; Quincegotas de A Coruña e Cartografías en movemento de Lugo.