Valdoviño celebra este domingo a segunda edición da carreira Volta ás Forcadas

O Concello de Valdoviño celebrará este domingo, 11 de xuño, a segunda edición da carreira Volta ás Forcadas. Preto dun centenar de persoas formalizaron xa a súa inscrición a través da plataforma www.prueba-t.es, do email xan.suarez@prueba-t.es ou do teléfono: 652 214 833. O prazo, para os interesados, rematará este venres, 9 de xuño, ás 23:59 horas. A carreira inclúese no calendario do 2º Circuito CORRE POLO NORTE que promove o Concello de Valdoviño xunto ós municipios veciños de Ortigueira, Cedeira, Cariño, Cerdido, Mañón, San Sadurniño e Moeche. Todos eles, cun obxectivo común: crear e fomentar un hábito de vida saudable entre a veciñanza, abandoando o sedentarismo, ofrecendo a posibilidade de ocupar de forma saudable o seu tempo de ocio. Un obxectivo que pasa porque a actividade física en nenos e en familia sexa un elemento fundamental das persoas. De aí estas carreiras, onde o importante non son os resultados, senón a participación.

A II Volta ás Forcadas arrancará ás 11 horas e o punto de partida será Loira. Permitirá aos participantes descubrir un entorno natural único como é o encoro das Forcadas, considerado xa o segundo mar do municipio.

Nela poderán participar nenos e maiores e, segundo a idade, estas son as categorías: Pitufos (2010 e posteriores); Benxamín (2008-2009); Alevín (2006-2007); Infantil (2004-2005), Cadete (2000-2003), Sénior (1983-1999), Veteranos A (1966-1982) e Veteranos B (1965 e anteriores). A participación dos menores é gratuíta e, a cuota para as categorías sénior e veteranos, é de catro euros.