Galicia Ártabra Digital Noticias de Ferrol y la comarca de Ferrolterra.
Novo aniversario dun dos mercados máis tradicionais, senlleiros e lonxevos da comarca: a Feira do 21 de Cabanas. Neste mes de xuño alcanza os 106 anos e, con tal motivo, o Concello, a través da Concellería de Cultura e Turismo, organiza un xantar popular. Celebrarase, como marca a tradición, o 21 de xuño e os tickets poden mercarse de forma anticipada na propia casa consistorial de luns a venres de 9 a 14 horas. Hai dous menús: o primeiro inclúe unha ración de pulpo, pan e dúas copas de viño, así como café e bola e o prezo é de 12 euros, namentras que o segundo engade tamén media ración de churrasco e o prezo é de 15 euros.
Nesta liña, o Concello de Cabanas anima á veciñanza a celebrar este aniversario da Feira do 21 acudindo á cita. Como é habitual, os postos de venda de productos da horta, utensilios de labranza, cestería e outros permanecerán fieis nas inmediacións da praia da Madalena durante toda a mañá.
