Ferrol, dúas desfeitas e un funeral

O Foro de Amigos de Ferrol quere salientar as desfeitas que están levando a cabo por diferentes institucións na nosa cidade.

                                          —-ooooOoooo—-

A desfeita da Feira de Mostras (FIMO)

É vergonzoso o que está a pasar coa Feira Internacional de Mostras do Noroeste (FIMO), e as súas instalacións, situadas nun lugar privilexiado de Ferrol como é a enseada da Malata. Un recinto duns 50.000 metros cadrados entre superficie cuberta e descuberta, que dispón de dous amplos auditorios, cinco pavillóns principais, varios locais e oficinas, cafetería e restaurante, piscina e instalacións deportivas, ademáis do Edificio de Usos Múltiples e un amplo aparcamento. Trátase dun axeitado lugar para a celebración de exposicións comerciais, empresariais, deportivas, culturais e de lecer.

Na chamada Feira de Mostras, nacida en xaneiro de 1959, decana das existentes en Galicia e que tivo categoría internacional, tempo atrás celebráronse importantes certames sobre o sector naval, a empresa, o automóbil, a alimentación e diversas actividades de turismo e ocio, ademais de concertos e actuacións musicais. Tras recibir múltiples subvencións e ter unha pouco clarificada xestión pola parte dos seus responsables, hoxe arrastra a súa decadencia, sen ningunha clase de actividade, coas instalacións practicamente sen uso, en mal estado e con problemas de mantemento.

As instalacións da Feira de Mostras pasaron a ser propiedade do Concello de Ferrol desde o pasado ano 2015, sen que se coñeza que exista un mínimo Plan de Usos e Xestión das mesmas. Varias son as propostas de entidades e asociacións de Ferrol. Apuntamos unha notable iniciativa da Sociedad Artística Ferrolana: un Museo de Pintura que mostre os importantes fondos artísticos de pintores ferrolás que garda e ten en propiedade a inoperante Deputación Provincial da Coruña.

Dese xeito, ante a manifesta ignorancia do Concello de Ferrol, que se amosa incapaz de crear un Museo da Cidade, polo menos os cidadáns poderían contemplar as obras dos pintores ferroláns exiliados na Coruña.

A desfeita da Residencia de Canido

No barrio de Canido, ao comezo da rúa Alegre, levántase este amplo e descoidado edificio, antiga Residencia de Suboficiales do Exército de Terra, unha obra do máis puro e ortodoxo estilo racionalista, construída nos anos 1934/35. Neste intre o edificio presenta un estado lamentable, atópase valado e leva xa un ano pendente de ser reparado. Trátase dunha desaproveitada propiedade do Ministerio de Defensa, coa única utilidade neste intre de usarse como sede da entidade asistencial Aspaneps.

O edificio podería ser una magnífica Residencia de Maiores, tanto pola súa situación como pola súa amplitude e axeitada disposición interior. Aquí ten o Conselleiro de Política Social da Xunta de Galicia, José Manuel Rey Varela, que tanto vén de viaxe a Ferrol, unha boa ocasión de facer algo importante polo súa cidade natal.

O funeral pola Praza de Armas

Ou cecais, podemos chamala crónica dunha desfeita anunciada. Despois de esnaquizar o que era a Praza de España, desta volta tócalle a quenda das reformas á praza de Armas. Preténdese levar a cabo polo Concello de Ferrol un proxecto que leva o incoherente lema de “Lugar de todas” (iso de que vai ?; quizais “Lugar de todas as ocorrencias” ?), que non aporta nada á cidade e ademais esquece as opinións das asociacións de veciños e de comerciantes, que viven e traballan no barrio da Magdalena. O peor é a estúpida chapuza de colocar un chan de terra areosa nunha praza de acusada pendente, situada nunha cidade de alta pluviosidade.

Quizais non sexa o mellor momento para derrubar o fachendoso edificio apirulado do Concello, pero desde logo se tiña que facer unha praza axeitada para nenos e maiores, e respectar o necesario aparcamento subterráneo, deixando a entrada e saída do mesmo polas rúas da Terra e Rubalcava que arrodean a praza, e deste xeito poder facer peonil o correspondente tramo da rúa Real.

Visto o nome (Praça Porta Nova, no idioma portugués) que lle acaban de poñer á escangallada Praza de España, cando esbandallen a Praza de Armas, lembrando que nos séculos XVIII e XIX era o mercado da leña, cumpre que as chicas e chicos do Concello lle poñan o novo nome de Praça da Lenha (en portugués, por suposto).

Pola transcrición, Juan J. Burgoa, coordinador do Foro de Amigos de Ferrol