Valdoviño e Océano Surf Club invitan ó sector a participar na construción do primeiro Museo do Surf de España

O alcalde de Valdoviño, Alberto González, e Vicente Irisarri, en representación do Océano Surf Club, invitaron ó sector do surf en España a participar na construción do que se convertirá no primeiro Museo do Surf en territorio nacional. O chamamento tivo lugar onte á tarde na feira ExpoSurf, a primeira destas características no Norte de España, celebrada a pasada fin de semana no palacio de exposicións da Madalena de Avilés. Era o foro escollido polo Concello para levar a cabo a presentación nacional do Océano Surf Museo, cuxas portas prevé abrir en agosto.

E ata alí viaxaba unha delegación encabezada por Alberto González, Vicente Irisarri, as concelleiras de Turismo e Cultura, Rosana García e Jessica Sabín, así como representantes das escolas de surf de Valdoviño socias no proxecto –Iván Manso, Samuel Pantín e Marcos Pita (en representación de Valdo Surf School; Pantín Surf Camp; Alawa Surf Camp e Santiago de Pantín Surf)-.

No transcurso de ExpoSurf, os representantes locais non só pediron a colaboración do sector para ampliar e enriquecer os fondos do Museo, animando a todo aquel que o desexe a poñerse en contacto coa Administración local –tlf. 616 89 25 72 ou web@concellodevaldovino.com- para valorar posibles cesións, senón que tamén deron a coñecer un avance do documental sobre a historia do surf en Galicia. Traballo que está a disposición do público na web municipal www.concellodevaldovino.com e nas redes sociais do Concello e do propio museo.

O futuro Océano Surf Museo ubicarase na Casa da Cultura, edificio emblemático premio nacional de arquitectura e, na actualidade, o Concello traballa man a man coas escolas de surf do municipio e co Océano Surf Club nos contidos das instalacións, nos que se repasarán os orixes e historia do surf, prestarase especial atención ós seus precursores en Galicia e, tamén, ó Pantín Classic, unha das competicións máis senlleiras e veteranas do circuito.